రివ్యూ : శంభో శంకర

రివ్యూ : శంభో శంకర


Shambo Shankara Movie Review

రివ్యూ: శంభో శంకర
రేటింగ్‌: 2/5
తారాగణం: షకలక శంకర్,కారుణ్య చౌదరి,అజయ్ తదితరులు
సంగీతం:సాయి కార్తీక్
నిర్మాత: వై.రమణ రెడ్డి మరియు సురేష్ కొండేటి
దర్శకత్వం: శ్రీధర్

సినిమాకు ప్రధాన బలం హీరో. కథతో సంబంధం లేకుండా ముందు ప్రేక్షకులు హీరోను చూసే సినిమాకు వెళ్తారు. అందుకే హీరోకి అంత ప్రాధాన్యత. ప్రేక్షకులను మెప్పిస్తేనే ఆ హీరోకు మనుగడ ఉంటుంది. ఇప్పటి వరకు తెలుగు తెరపైకి చాలా మంది హీరోలొచ్చారు. కొంత మంది నిలదొక్కుకున్నారు. కొందరు కనుమరుగైపోయారు. తాజాగా హాస్యనటుడు షకలక శంకర్ హీరోగా మారి అదృష్టాన్ని పరీక్షించుకుంటున్నాడు. ‘శంభో శంకర’ అంటూ ప్రేక్షకుల ముందుకు వచ్చాడు. తన స్థాయికి తగ్గ పాత్రలు రావడంలేదని, అందుకే హీరోగా మారానని చెపుతున్న శంకర్.. హీరోగా తన స్థాయిని చూపించాడా..? చూద్దాం..

అంకాలమ్మపల్లి ఒక చిన్న గ్రామం. అక్కడ ప్రెసిడెంట్(అజయ్ ఘోష్)దే రాజ్యం. 50 ఏళ్ల చరిత్ర ఉన్న కుటుంబం అంటూ గొప్పలు చెబుతుంటాడు. తన ముత్తాత దగ్గర నుంచి ఊరికి ప్రెసిడెంట్‌లు తమ కుటుంబం నుంచే అవుతున్నారని, ఊళ్లో అంతా తన మాటే వినాలని శాసిస్తాడు. ప్రజలకు ఎలాంటి సహాయం అందకుండా వారిని కాల్చుకు తింటాడు. అటవీ సంపదను దోచుకుని ప్రెసిడెంట్ అక్రమంగా సంపాదిస్తుంటే అతనికి ఎస్సై దన్నుగా నిలుస్తాడు. ఈ క్రమంలో అదే గ్రామానికి చెందిన శంకర్ (షకలక శంకర్) వీళ్లకి ఎదురుతిరుగుతాడు. అయితే ఓ అనుకోని సంఘటన శంకర్‌కు ప్రెసిడెంట్‌కు మధ్య వైరం తెస్తుంది. శంకర్‌పై హత్యాయత్నం కూడా జరుగుతుంది. అసలు ఇదంతా చేస్తుంది ప్రెసిడెంట్ కాదని, మరో వ్యక్తని శంకర్ తెలుసుకుంటాడు. ఇంతకీ ఆ వ్యక్తి ఎవరు..? శంకర్‌ను ఎందుకు చంపాలనుకుంటాడు..? ఊరికి ప్రెసిడెంట్, ఆ వ్యక్తి పీడను శంకర్ వదిలించాడా..? అనే విషయాలు సినిమా చూస్తే తెలుస్తాయి.

ఊరి పెద్ద గుప్పిట్లో ఓ గ్రామం నలిగిపోవడం, దాన్ని ఆ ఊళ్లో కుర్రాడు ఎదిరించడం, చివరికి ఆ ఊరి పెద్ద పీడ వదిలించడం.. ఎన్ని రాలేదు ఇలాంటి సినిమాలు. ఇది కూడా ఆ కోవకు చెందిందే. కాకపోతే క్లైమాక్స్‌లో చిన్న ట్విస్ట్ కొత్తగా ఉంది. ఆ ట్విస్ట్ తెలుసుకోవాలంటే ముందు రెండు గంటలు సినిమాను భరించాలి. దర్శకుడు శ్రీధర్ సన్నివేశాలను బలంగా రాసుకోలేకపోయారు. సినిమాలోని ఏ సన్నివేశం ప్రేక్షకుడికి హత్తుకోదు. సాధారణంగా హాస్యనటుడు హీరోగా మారిన సినిమాలో ప్రేక్షకులు కామెడీని ఆశిస్తారు. కానీ ఈ సినిమాలో హాస్యం కన్నా యాక్షనే ఎక్కువగా ఉంది. కొంత మంది కొత్త కమెడియన్లతో నవ్వించడానికి ప్రయత్నించినా ఫలించలేదు. సింపుల్‌గా చెప్పాలంటే ఇది శంకర్ వన్ మ్యాన్ షో.

పవన్ కళ్యాణ్‌పై తనకున్న అభిమానాన్ని శంకర్ సినిమాలోనూ చూపించేశాడు. పవర్‌స్టార్‌కి శివుడి అవతారం వేసి గుమ్మం ముందు నిలబెట్టాడు. అంతేకాకుండా పవన్ ట్రేడ్ మార్క్ ‘ఎర్రతుండు’ను తానూ వేసుకున్నాడు. దాని పవర్ గురించి చాలా సీరియస్‌గా ఎస్సైకు లెక్చర్ ఇచ్చాడు. అయితే ఈ సన్నివేశాలన్నీ అనవసరం అనిపిస్తుంది. ఇక శంకర్ చెల్లెలు హత్యకు గురయ్యే సన్నివేశం సినిమాకు చాలా కీలకం. కానీ ఆ సన్నివేశం కూడా ప్రేక్షకుడిని భావోద్వేగానికి గురిచేసేలా లేదు. శ్మశానం వద్ద శంకర్ చేసే హడావుడి విసుగు తెప్పిస్తుంది. అయితే యాక్షన్ సన్నివేశాలను మాత్రం బాగా తెరకెక్కించారు. ఇంటర్వెల్‌కు ముందు ప్రెసిడెంట్‌ ఇంటికెళ్లి అతనికి శంకర్ వార్నింగ్ ఇచ్చే సీన్ బాగుంది. సెకండ్ హాఫ్‌ అంతా ప్రెసిడెంట్‌ను ఇబ్బంది పెట్టడం, ప్రజలకు మంచి చేయడం ఇదే పని శంకర్‌కు. అతనికి ఎస్పీ (నాగినీడు) దన్నుగా నిలుస్తారు.

సినిమాలో కొన్ని సన్నివేశాలు ప్రేక్షకుడికి అస్సలు రుచించవు. శంకర్‌పై పోలీసులు ఎఫ్ఐఆర్ నమోదుచేసినా ఎస్పీ తన పూచీకత్తుపై అతన్ని వదిలేయమనడం విడ్డూరంగా ఉంది. అంతేకాకుండా శంకర్‌ను గ్రామానికి మోరల్ పోలీస్‌గా నియమించి.. ఎస్సైను అతన్ని ఫాలో అవ్వాల్సిందిగా ఎస్పీ ఆదేశించడం ఇంకా విడ్డూరం. ఈ క్రమంలో హీరోయిజం అతి అయ్యిందనే భావన ప్రేక్షకుడికి కలుగుతుంది. సినిమాలో కాస్త ఊరట ఏమైనా ఉందంటే అవి పాటలు, నేపథ్య సంగీతం.

శంభో శంకర : కమెడియన్ హీరో పక్కా మాస్ యాక్షన్ సినిమా

Comments