రివ్యూ : రాజుగాడు

రివ్యూ : రాజుగాడు


Raj Tarun Rajugadu Review

రివ్యూ: రాజుగాడు
రేటింగ్‌: 1.5 /5
తారాగణం: రాజ్ తరుణ్, అమైరా దస్తూర్, రాజేంద్ర ప్రసాద్  తదితరులు
సంగీతం: గోపి సుందర్
నిర్మాత: సుంకర రామబ్రహ్మం
దర్శకత్వం:  సంజనారెడ్డి

‘ఉయ్యాల జంపాలా’ చిత్రంతో హీరోగా పరిచయమైన రాజ్ తరుణ్ టాలీవుడ్‌లో మంచి గుర్తింపునే సంపాదించుకున్నాడు. కానీ కొంతకాలంగా ఆయన సినిమాలేవీ కూడా బాక్సాఫీస్ దగ్గర సరైన సక్సెస్ అందుకోలేకపోతున్నాయి. తాజాగా ఈ హీరో నటించిన 'రాజుగాడు' సినిమా ప్రేక్షకుల ముందుకు వచ్చింది. సంజనారెడ్డి ఈ చిత్రంతో దర్శకురాలిగా పరిచయం అయ్యారు. మరి సినిమా అయినా.. రాజ్ తరుణ్‌కు విజయాన్ని అందించిందేమో సమీక్షలోకి వెళ్లి తెలుసుకుందాం!

రాజు (రాజ్ తరుణ్) చిన్నప్పటినుండి నుండి క్లెప్టోమేనియా అనే వింత జబ్బుతో బాధ పడుతుంటాడు. ఈ వ్యాధి లక్షణం తమకు తెలియకుండానే దొంగతనం చేయడం. ఎంతమంది డాక్టర్లకు చూపించినా ప్రయోజనం ఉండదు. రాజుతో పాటు దొంగతనం చేసే అలవాటు కూడా పెరుగుతుంటుంది. ఒకరోజు హీరోయిన్ తన్విని (అమైరా దస్తూర్) చూసి మొదటి చూపులోనే ప్రేమపడుతాడు రాజు. తన్వి కూడా రాజుని ఇష్టపడుతుంది. తనకు దొంగతనాలు చేసే అలవాటు ఉందని తన్వికి తెలిస్తే ఎక్కడ దూరమవుతుందోనని తెలియకుండా మ్యానేజ్ చేస్తుంటాడు. రెండు ఫ్యామిలీస్ లో వీరి పెళ్లికి పెద్దలు అంగీకరిస్తారు. దీంతో రెండు కుటుంబాలు కలిసి తన్వి తాతయ్య(నాగినీడు) గారింటికి వెళ్తారు. ఊర్లో దొంగతనాలు చేసే వారిని క్రూరంగా శిక్షించే తన్వి తాతకు రాజు దొంగ అని తెలిస్తే ఎలా రియాక్ట్ అవుతారు..? రాజు తను ప్రేమించిన అమ్మాయిని పెళ్లి చేసుకున్నాడా..? చివరికి అతడి కథ ఏమవుతుంది..? అనేదే మిగిలిన సినిమా.

హీరో పాత్రకు క్లెప్టోమేనియా అనే జబ్బుని యాడ్ చేసి సినిమా మొత్తాన్ని కామెడీ వేలో ప్రెజంట్ చేయాలన్నారు దర్శకురాలు. కామెడీ ట్రాక్‌ కథను ఎంచుకోవడంతో పాటు అది ట్రాక్ తప్పకుండా రెండున్నర గంటలు ఎంటర్ టైనర్ చేయడం అనేది ఓ సాహసం అనే చెప్పాలి. ఈ విషయంలో కొంతవరకు సక్సెస్ అవ్వగలిగారు. కానీ పూర్తిస్థాయిలో ఆడియన్స్‌ను మెప్పించలేకపోయారు. కథను వినోదాత్మకంగా మొదలుపెట్టి హీరో పాత్రతో కొంత కామెడీ పండించారు. అయితే ఆ కామెడీ కొన్ని సన్నివేశాలకు మాత్రమే పరిమితమైంది. కనీసం సన్నివేశాలను బలంగా రాసుకున్నారా అంటే అదీ లేదు. కొన్ని సీన్స్‌లో లాజిక్స్ కూడా దొరకవు. ఈ సినిమాకు నాని నటించిన 'భలే భలే మగాడివోయ్' సినిమా స్ఫూర్తి అంటూ దర్శకురాలు ఓ ఇంటర్వ్యూలో చెప్పుకొచ్చింది. ఆ సినిమా హిట్ అయిందంటే దానికి కారణం కాన్సెప్ట్‌తో పాటు కామెడీ ఎపిసోడ్స్, ఎమోషన్‌ను బాగా పండించారు.

అయితే ఈ సినిమాలో మాత్రం కామెడీ ఆశించిన స్థాయిలో దొరకదు. ఫస్ట్ హాఫ్ రెండు కామెడీ సన్నివేశాలు ఓ లవ్ ట్రాక్ అంటూ రొటీన్‌గా సాగిపోతుంది. హీరో పాత్ర గ్రామంలో ఎంటర్ అయినప్పటి నుండి కామెడీ మళ్లీ పుంజుకుంటుంది. కొద్దిసేపటికే సన్నివేశాలను సాగదీసి చూపించడంతో ఉన్న ఆసక్తి కూడా తగ్గిపోతుంది. హీరోయిన్ తాతయ్య ఇంట్లో జరిగే సంఘటనలు ఆకట్టుకోవు. అనవసరమైన ఎపిసోడ్స్‌ను కథకు జోడించి ల్యాగ్ చేశారు. ఇక పతాక సన్నివేశాల గురించి మాట్లాడుకోకపోవడమే మంచిది. కథ, కథనాలు ఎలా ఉన్నా.. తన ఎనర్జిటిక్ పెర్ఫార్మన్స్‌తో సినిమాను నడిపించే రాజ్ తరుణ్ ఈ సినిమాలో మాత్రం ఈజ్‌తో నటించలేదనిపిస్తుంది. తన పాత్ర ద్వారా కామెడీ అందించే ప్రయత్నం చేశాడు.

ఇక సినిమాకు హైలైట్‌గా నిలిచింది రాజేంద్రప్రసాద్ నటన. హీరో తండ్రిగా అతడు చేసిన పెర్ఫార్మన్స్‌ను మెచ్చుకొని తీరాలి. అతడి బాడీ లాంగ్వేజ్, నటన ప్రేక్షకులను ఆకట్టుకుంటాయి. హీరోయిన్ అమైరా దస్తూర్‌కి ప్రాధాన్యత ఉన్న పాత్ర ఇచ్చినప్పటికీ.. ఆమె స్క్రీన్ ప్రెజన్స్ పెద్దగా ఆకట్టుకోదు. నాగినీడు, రావు రమేష్ వంటి సీనియర్ నటులు తమ పాత్రలకు పూర్తి న్యాయం చేశారు. డాక్టర్ పాత్రలో పృధ్వీ అక్కడక్కడా ఆడియన్స్‌ను నవ్విస్తాడు.

డైరెక్టర్‌గా సంజనాకు మొదటి సినిమా కావడంతో ఎంటర్టైన్మెంట్‌తో ఉన్న కథను రాసుకున్నారు. కానీ ఆ కథను ఆడియన్స్‌కు కనెక్ట్ అయ్యేలా చిత్రీకరించలేకపోయారు. అక్కడక్కడా కామెడీ తప్ప సినిమాలో చెప్పుకోవడానికి ఏంలేదు. సంగీతం పెద్దగా ఆకట్టుకోదు. బ్యాక్ గ్రౌండ్ స్కోర్ ఓకే అనిపిస్తుంది. సినిమాలో ఎడిట్ చేయాల్సిన సన్నివేశాలు చాలానే ఉన్నాయి. సినిమాటోగ్రఫీ వర్క్ బాగుంది. నిర్మాతలు ఎక్కడా రాజీ పడకుండా సినిమాను రూపొందించారు. ‘క్లెప్టోమేనియా’ అనే రోగం కాస్త కొత్త కనిపించినప్పటికీ.. మంచి కామెడీ ఎంటర్టైనర్ అనుకొని సినిమాకు వెళ్లే ప్రేక్షకుల్ని ‘రాజుగాడు’ నిరాశ పరిచాడు.

రాజుగాడు: ప్రేక్షకులకు నిరాశ

 

Comments